રાખ ચોળી જે મસાણી થઈ ગયા

રાખ ચોળી જે મસાણી થઈ ગયા,

એમના જીવન ઉજાણી થઈ ગયા.

એક એવી તો હકીકત કઈ બની?

લાખ શમણા ધૂળધાણી થઈ ગયા.

જોઈને સૌંદર્ય મારી પ્યાસનું,

ઝાંઝવા પણ પાણી પાણી થઈ ગયા.

કીંમતી બે-ચાર રત્નો યાદના,

જિંદગી ભરની કમાણી થઈ ગયા.

જે કદી દિવસે મહેંકી ના શક્યા,

ફૂલ એ સૌ રાતરાણી થઈ ગયા.

અવસરો હમણા ગયેલા પ્રેમના,

જોતજોતામાં કહાણી થઈ ગયા.

'રાજ' મારા શબ્દને બસ બોલવા,

કેટલાયે મૌન વાણી થઈ ગયા.

raakh cholii je masaanii thaii gyaa