રેખ્તા
હિન્દવી
સૂફીનામા
રાજસ્થાની
ઝવેરચંદ મેઘાણી
કે સમી સાંજના તારલિયા!
સો સો બહેનીના વીર-
સાંજલ તારા! ગુણિયલ તારા!
કે તુજ ઊગ્યે પંખીડલાં
લપછપતાં તરુવર-ડાળ-
સાંજલ તારા! ઝગમગ તારા!
કે તુજ ઊગ્યે ધણગાવડી
વળી જાતી વાછરું પાસ-
સાંજલ તારા! ટમ ટમ તારા!
કે તુજ ઊગ્યે ફૂલડાં તજી
મધપૂડે પોઢે માખ-
સાંજલ તારા! રૂમઝૂમ તારા!
કે તુજ ઊગ્યે ઘર આવતા
મજૂરોના લથબથ ઘેર-
સાંજલ તારા! નિર્મળ તારા!
કે તુજ ઊગ્યે પનિયારી
પિયુ-શું માંડે મદભર મીટ-
સાંજલ તારા! ઝલમલ તારા!
કે તુજ ઊગ્યે વનિતા ઢળે
વાલમના ખોળામાંય-
સાંજલ તારા! શ્રમહર તારા!
કે તુજ ઊગ્યે વિખૂટાં સહુને
ફરી મળ્યાની આશ-
સાંજલ તારા! રાજલ તારા!
કે હું એક જ હતભાગણી!
મારો શો દીઠો તેં દોષ-
સાંજલ તારા! બાંધવ તારા!
કે આઘાં ખેતર ખેડતો
મારો ખેડુ ક્યાં રોકાય?-
સાંજલ તારા! સોનલ તારા!
કે હળજૂત્યા મુજ વાછડા :
ક્યમ હજી ન ભાળું ખેપ?-
સાંજલ તારા! દેવલ તારા!
કે બાળપણથી જોતર્યા :
મને ડૂકી ગયાની બીક-
સાંજલ તારા! હીરલ તારા!
કે દૂબળડા એ હાથની
નવ દેખું રમતી રાશ-
સાંજલ તારા! તેજલ તારા!
કે થાકીપાકી જીભના
નવ ડચકારા સંભળાય-
સાંજલ તારા! સુખિયા તારા!
કે ભૂખ્યા પગની ડાંફ ભરતો
નવ ભાળું ભરથાર-
સાંજલ તારા! બાંધવ તારા!
કે વરસ બધું રળવું છતાં
નવ અધઘડીના વિશ્રામ-
સાંજલ તારા! ટમટમ તારા!
કે વ્રતઉત્સવ જગ ઊજવે,
મારે ગળે ન આવે ગીત-
સાંજલ તારા! ગુણિયલ તારા!
કે ચંદન-છાંટી રાતડી :
મારા હૈયામાં ન હુલાસ-
સાંજલ તારા! રૂમઝૂમ તારા!
કે આવડી વસમી શેં હશે
આ કાઠીડાની ખેડ્ય-
સાંજલ તારા! ઝળહળ તારા!
કે દુશમન પણ નવ ખેડજો
આ દરબારીડો દેશ—
સાંજલ તારા! દેવલ તારા!
સ્રોત
- પુસ્તક : સોના નાવડી (પૃષ્ઠ ક્રમાંક 119)
- સંપાદક : જયંત મેઘાણી
- પ્રકાશક : ગુજરાત સાહિત્ય અકાદમી
- વર્ષ : 1997