ત્રણ વિરહકાવ્યો

ત્રણ વિરહકાવ્યો

(૧.) ગઈ રાતે

ગઈ રાતે

તારાઓના પ્રકાશમાં

સામેના વૃક્ષની ડાળીને

એકાએક વીંઝાતી જોઈ

આમતેમ

ઉપરતળે

– ને તમે સાંભરી આવ્યા –

પછી તો

ડાળી પવનની છાતી પર શાન્ત

ને હું

આમતેમ

ઉપરતળે

આખી રાત વીંઝાતી...

(૨.) પરોઢિયે

પરોઢિયે

આછા અંધકારમાં

તમે સામે ઊભા રહીને કહ્યું :

‘મારે જવું જોઈએ...

હમણાં સૂરજ ઊગશે...’

તમે તો ગયા; પણ...

સૂરજ પછી ઊગ્યો જ નહીં!

(૩.) નસીબ જ

મેં જોયું છે કે

તમે હમેશાં ભૂલા પડો છો :

કેટલીય વાર

છેક ઘર પાસે આવીને

પાછા વળી ગયા છો!

રસ્તો તો સાવ સીધો છે

– નસીબ જ વાંકું...

Tran Virah Kavyo