હાથીભાઈની ચરબી

હાથીભાઈની ચરબી

દિલમાં દુઃખતાં હાથીભાઈ તો દોડ્યા દવાખાને,

રિપોર્ટ દેખી ડૉક્ટર કહે : વાત ધરજો કાને.

થોડી થોડી જામી ગઈ છે લોહી ભેળી ચરબી,

કસરત કરવી, ચરબીવાળું કાંઈ ન લેવું ધરબી.

લખી આપું એક ટૅબ્લેટ મહિનો રાતે ગળવી,

રિપોર્ટ આવે જો નોર્મલ તો દવા કરીશું હળવી.

ચરબી ઓછી કરવા હાથી સાઇકલ રોજ ચલાવે,

સવાર સાંજે સસલા સંગે એ તો હોડ લગાવે.

કરે પુલ-અપ્સ વડલા ડાળે, વડલો આખો નમતો,

વધે ન ચરબી, ધ્યાન રાખતો, ઝાડ-પાન બસ જમતો.

મહિનો પૂરો થાતાં હાથી ગયો ડૉક્ટર પાસે,

રિપોર્ટ દેખી ડૉક્ટર કહે : કસરતથી ચરબી નાસે.

haathiibhaaiinii charbii